Co gallo da dimisión do alcalde de Brión, traio unha curiosidade toponímica. Como é sabido, os topónimos de cada lugar xéranse no idioma correspondente: na Galiza en galego. Porén, existe algunha leve excepción (só aparente), como as catro parroquias da diocese de Santiago chamadas San(ta) ****** de Los Ángeles (hoxe todas adaptadas -con maior ou peor fortuna- ao galego).

Claro que Los Ángeles tampouco era o seu nome orixinal senón o resultado do labor deturpador e castelanizador dun dos moitos arcebispos foráneos padecidos pola mitra compostelá: o palentino Fernando Blanco, na segunda metade do século XVI. Os nomes realmente propios desas freguesías eran:

Santa María de Perros (unha en Brión e outra en Boimorto)

Santa María de Malos (Melide, municipio situado no Camiño Francés)

San Mamede de Cans (topónimo orixinal dubidoso) (Oroso)

Seica Perros (nada que ver con animais), Malos e Cans non eran topónimos suficientemente presentables para o devandito arcebispo.