COVID-19 (datos mundiais 24/03). Italia volve empeorar

A escalada de vítimas do virus en todo o mundo ten altos e baixos, e despois de tres días relativamente bos, con certa desaceleración, volvemos hoxe a peores cifras. Italia, o país máis afectado, rexistrou un novo aumento (743 mortes), tras tres descensos consecutivos. En todo caso, o máximo marcouse o día 20, con 793, que afortunadamente segue por debaixo desa cifra.

España en cambio marca novo alto con 512. Francia informa de 186 novas mortes, Estados Unidos 139 e Irán 122.

Continúan incorporándose outros países europeos á nosa lista dos catorce máis afectados, axustado segundo a súa poboación. Hoxe entra Austria e sae Corea do Sur, que case seguro que non volverá a ela. Probablemente tamén sairá China nos próximos días, substituída por Alemaña ou Estados Unidos.

NOTA: Para os efectos do gráfico só consideramos os países con 8 ou máis falecidos e con máis de 500.000 habitantes.